第四波疫情下每日確診數字經常破百，更有唔少感染源頭不明，雖然港府為應對新一波疫情而搞到焦頭爛額，但普遍香港人似乎未有太大恐慌，周末無論市區定郊區一樣人山人海，酒樓門口大排長龍。點解所有人都好似大安旨意咁？無他嘅，特首都話疫苗最快下個月就到香港，中央亦講到明國產疫苗會預留香港嗰份，難怪咁多人底氣十足，或者好多人心諗，反正香港政府搞咁耐防疫，都好似都冇乜成效，不如等疫苗算啦！

當然啦，防疫絕對唔應該鬆懈，但國家嘅支持，確實畀咗香港人唔少信心。遠嘅唔講，淨係回顧呢半年，香港經歷黑暴後千瘡百孔，國家頂住以美帝為首嘅列強壓力，推行國安法鎮懾黑暴勢力；疫情嚴峻時，國家又派支援隊嚟香港幫手做檢測；去到近月，更出手DQ四個政棍，以致反對派集體總辭，令紛亂多時嘅立法會重回正軌，民生事項暢行無阻。

國家一次又一次出手，每次都成功將香港人喺水深火熱之中拯救出嚟，今次中央講到明會為香港預留國產疫苗，無疑為香港人再打一支強心針，只要有國家嘅支持，香港就可以繼續繁榮穩定落去！要知道中國地大物博，小小香港算係啲乜？但國家對香港嘅支持始終義無反顧，眼見西方國家畀疫情搞到雞毛鴨血，而中國經濟早就恢復，我哋喺國家支援下，亦即將脫離疫境，真係不得不慶幸自己係香港人，而且係一個中國香港人！

原圖：港台新聞截圖