一場美國總統大選，除咗對當地人民，亦係對香港黃絲智商嘅檢驗。

香港時間11月4日，美國多數州份仲未點完票，所有選舉資料都只不過係推算。當時美國傳媒普遍報道，民主黨候選人拜登遙遙領先現任總統特朗普，黃絲梗係唔高興啦，佢哋認定一切都係「左媒」嘅陰謀同手段，刻意抬高拜登踩低侵侵，係為咗鋪定後路，萬一拜登最後輸咗，藍絲就可以詆譭美國民主制度有問題。

呢個時候，黃絲們仍然天真地相信特朗普會贏，因為當時拜登似乎已經再無潛在票數增長，而剩下嘅搖擺州份，表面上仍然係侵侵領先。然而，當晚選情急劇變化，拜登喺多個搖擺州份收窄同侵侵嘅差距，大有逆轉之勢。而黃絲亦終於知醒，唔見藍絲話美國民主制度點點點，只見一班黃絲已經喺度大鬧美國選舉係「垃圾制度」。

而同黃絲一樣唔服輸嘅侵侵總統，日前演講時無理質疑對手民主黨「竊取選舉」，隨即被美國三大電視中斷直播，理由係有關指控缺乏證據。同時，網絡上出現大量抹黑拜登帖文，製造民主黨喺選舉舞弊嘅疑雲，令到Facebook、Twitter等社交媒體，亦不得不加強監管有關選情嘅假新聞。

黃絲們又鬧喇，係中國收買同滲透美國傳媒，所以侵侵先會受到打壓。嗯......過去美國媒體報道香港反修例暴亂，批評香港警察如何「濫暴」時，班黃友有幾咁興奮幾咁雀躍，我諗，大家應該仲有印象。

眼見特朗普大勢已去，黃絲們又開始幻想了，話只要最後打到上美國最高法院，證明拜登喺選舉中舞弊，佢哋嘅侵侵就可以繼續做總統喇！最自由最民主嘅美國喎，佢哋嘅司法系統一定係好嘢啦！

好明顯，黃絲從來唔會願意接受現實，佢哋擁抱美式民主，但當民意擺在眼前，就話有人作弊；佢哋祟尚新聞自由，但當媒體報道逆耳真相，就話係畀中共收買。按照呢個邏輯，唔知佢哋對美國司法嘅信念又會有幾強？

我大膽預言一句，拜登入主白宮之時，黃絲又會話美國「司法而死」，因為佢哋真係蠢，唔係扮㗎喎！

原圖：無綫新聞截圖