港區國安法由七月一日實施至今就快三個月，涉違反國安法嘅壹傳媒黎智英日前係社交平台直播時就話，香港言論自由正被收窄，市民均擔心被以言入罪，又指香港已失去靈魂，不是原有嘅面貌。

有學者就直斥黎智英廢噏，指香港失去靈魂嘅始作俑者，恰恰就係黎智英等反中亂港分子，肆無忌憚唱衰香港。阿哥，依家你一身都係罪，涉違反國安法、非法集結等罪，仍可在直播上肆無忌憚地廢噏冇謂，刷存在感，香港嘅言論自由何來收窄？這不是自打嘴巴嗎？

禍港之首 唔該慳啲

講真，內地官媒一早定性黎智英為叛國禍港之首，而黎智英其實又一早將自己靈魂出賣給美爹，佢勾結泛民反中亂港幾十年，搞到香港雞毛鴨血、七國一皮，自己出賣靈魂「為美國而戰」，連鄉親都恥與為伍，要與之割席，踢其出族譜，一個大漢奸卻又妄想天主打救，唔去彌撒又諸多辯解話畀人跟，轉而在家日日祈禱云云！明明係「狗仔隊之父」竟怕被人跟？講鬼古咩？依家又賊喊捉賊，自己靈魂早已賣給撒旦，卻指港府冇靈魂！唔該慳啲啦！

講到冇靈魂，筆者倒聯想起司法界近排真係好似撞邪咁，冇晒靈魂！嗱！香港素以司法公正為傲，之不過，近排多位重量級司法界人物卻不約而同認為司法制度係時候要改革。事實上，有論者直指香港根本冇三權分立，而係三權扯皮，司法獨大！法律界有個笑話，指回歸以前，法官只相信警方嘅證供，回歸後法官只相信辯方嘅證供！雖是笑話，倒也道出本港司法制度畸形一面。

大家都睇到唔少牽涉黑暴嘅判案，都見法官質疑執法者，好似去年十月，有一名男學生被指係黃大仙紀律部隊宿舍附近向警方投擲磚塊，法官就話警察證供不可信，判處被告罪名不成立。仲有一單係有位大專生係葵涌紀律部隊宿舍外掟酒樽及雜物，都係判罰款兩舊水，遠低於垃圾蟲嘅一千五百個大洋。甚至十五歲少年擲汽油彈，都被官形容為「優秀嘅細路」！如此判案，你話有冇靈魂喇？

警察拉人 法庭放人

「警察拉人，法庭放人」又唔係完全冇根據噃！有終審法院前常任法官指法庭「自我賦權」，過去一年，法院變相鼓勵咗街頭抗議和暴力活動，搞到社會雞犬不寧，又唔係冇道理喎！講到尾，香港真係要宣傳吓「重拾靈魂運動」，唔好畀啲牛鬼蛇神繼續搞亂香港！好似去年「七一」闖入立法會大樓大肆破壞嘅，竟然有議員充當「保護傘」，阻止警察執法，掩護蒙面暴徒撒退！你話啲咁嘅「議員」如何會重拾「初心」，諗住一心一意服務市民吖？佢哋靈魂同漢奸黎一樣早已交給魔鬼，對住佢講「初心」，同叫隻食人猛虎立地成佛一樣咁荒謬！

是以漢奸黎話香港已失去靈魂，一個冇靈魂嘅人成日講神，上帝豈能不笑？

原圖：無綫新聞截圖、大公報圖片

http://news.takungpao.com.hk/hkol/politics/2015-01/2882866.html