世事無絕對，只有荒謬劇！

嗱！亂拋垃圾或丟個煙頭落地，咁啱畀食環署人員抓個正着被票控，都要破財一千五百個大洋喇！之但係，從高空擲好多嘢落街，又可以乜事都冇發生過喎！嘞！今年情人節，深井青山公路青龍頭段豪景花園發生駭人動物兇案，有三十隻動物被人由高處擲下，其中十八隻動物死亡，引起社會嘩然！警方當時拘捕兩名涉案男子；惟事隔近七個月，警方日前表示律政司決定不就案件提出起訴。

喂！橫睇掂睇，高空擲物冇得走雞啦！「自建築物掉下的物體」，即屬犯罪，可處罰款一萬蚊及監禁六個月！律政司就咁放生呢兩個人，更何況仲有一個疑兇自己去自首添！咁都唔告，仲唔係荒謬劇？

以上情景，令筆者想起壹傳媒黎智英一向反中亂港永遠走在最前線，佢涉恐嚇東方報業集團記者罪名不成立，有議員指佢早前被裁定有關罪名表證成立，大眾對其劣行及惡形惡相亦有目共睹，卻一再獲「放生」感到激氣，質疑佢有保護傘免除刑事責任。亦有評論員質疑法庭是否畏懼美、英而為佢撐腰而不敢判罪？

「我相信法律，卻懷疑法官」

黎智英連同刑恐東方男記者案在內，近年佢至少四次被司法「放生」及未被檢控，包括秘捐政治黑金案、幕後策劃違法佔中，以及不久前壹傳媒股價異動案等，被內地媒體形容係「叛國禍港」。黎智英明明涉及好多條罪，法官都覺得佢係「誠實、可信」，反而被恐嚇到要睇心理醫生，確實患上抑鬱心境適應障礙，就被指「不誠實不可靠」！筆者不禁想起已故嘅李敖大師一句話：我相信法律，卻懷疑法官！李敖嘅話，如今回味，有其深義焉！唉！世事無絕對，只有荒謬劇！筆者都唔想多講咯。倒不如同讀者分享唐朝名僧一段頗具禪機嘅對話：

寒山問拾得：世間有謗我、欺我、辱我、笑我、輕我、賤我、騙我，如何處置？

拾得就答：只要忍他、讓他、避他、由他、耐他、敬他，不要理他，再過幾年，你且看他。

看官，這對話看似「戇居」，怎麼就如此忍讓，任由一些惡人奸宄橫行無忌？

且不要動氣，寒山最有禪機嘅話在「再過幾年，你且看他」！筆者也信因果報應，中國人愛說一個人壞事做盡，要「因住收尾個幾年」，又或者法律吹你唔脹，必定「天收你」或遭天譴！總之，出得嚟行，遲早要還！「再過幾年，你且看他」！善惡到頭終有報。老天爺，唔會唔長眼睛嘅！

原圖：星島日報

https://std.stheadline.com/daily/article/2273808/%E6%97%A5%E5%A0%B1-%E6%B8%AF%E8%81%9E-%E9%BB%8E%E6%99%BA%E8%8B%B1%E8%84%AB%E6%81%90%E5%9A%87%E7%BD%AA-%E5%AE%98%E6%8C%87%E7%84%A1%E9%A0%90%E8%AC%80%E4%BB%A4%E5%B0%8D%E6%96%B9%E5%8F%97%E9%A9%9A