【世看疫情】多國研究人員痛打侵侵塊臉？話說美國侵侵總統N次同大家推介用抗瘧疾藥物「羥氯喹」（Hydroxychloroquine）抗疫，仲話自己都有食，講到神乎奇神。然而，有不知好歹的學者竟然較真，真係走去做研究，仲要係做咗一份涵蓋全球671間醫院，涉及　9.6萬名病人嘅研究。有關研究發表喺英國著名醫學期刊《刺針》，發指呢隻藥對治療新冠肺炎唔止冇用，而且有害：食咗羥氯喹或者氯喹嘅病患，死亡率同出現心律不正嘅比率，都較冇食嘅病人高。

一巴又一巴

基於此，研究人員建議唔好為病人開羥氯喹，仲建議美國應該撤銷羥氯喹治療疫情嘅緊急許可。簡而言之，研究人員起勢一巴又一巴咁摑落侵侵度。

你哋做乜咁唔畀面呀？不過其實侵侵真係唔要面，所以你哋畀面唔畀面，對侵侵應該都冇大傷害。侵侵食完隻藥有冇心律不正，佢有錢又有權，實有醫生同佢Check真啲。但佢有冇心術不正，相信全世界都有眼見，這場疫情令佢嘅真面目，再一次盡現人前。

原圖：無綫新聞截圖