【世看疫情】新冠肺炎於多個國家爆發，更有不少奇異嘅抗疫方式傳出，繼早前美國總統特朗普忽發奇想話注射消毒液殺死病毒(請按此重溫)，伊朗有民眾誤信飲甲醇可抗疫，逾5,000人中毒，超過700人因而死亡。

據半島電視台（Al Jazeera）報道，根據4月初喺新冠肺炎大流行期間發布嘅政府報告，過去一年中，伊朗嘅酒精中毒事件增加了10倍。伊朗法醫當局指出，今年只係2月20日至4月7日間，就已經有728人因酒精中毒喪生。

90人失明或視力受損

而伊朗衛生部發言人Kianush Jahanpur表示，自2月20日以嚟，有5,011人因為誤飲具有毒性嘅甲醇而中毒，其中525人死亡，更稱當中約有90人因酒精中毒而失明或視力受損。

衛生部顧問Hossein Hassanian解釋兩個數字嘅差距，表示因有約200人並非於醫院身亡，因此，佢指出失明嘅總數最終可能會更多。

而喺美國制裁下，經濟受壓嘅伊朗成為新冠肺炎爆發受創最重嘅中東國家，目前累計超9萬起病例、5,806人因疫離世。

都係嗰句︰疫情之下，大家小心！

原圖：無綫新聞截圖