壹傳媒老闆黎智英經營不善，旗下業務流血不止，繼台灣摺咗台版《壹週刊》外，幾賣盡在台產業還債。目前香港嘅《蘋果日報》又喊晒救命，一味叫人網上訂閲，「畀多次機會我⋯⋯」可憐到慘過賣火柴女孩！
呢！早前一大輪攻勢，幾乎喺《蘋果日報》賣文嘅，無不叫讀者每日用一蚊幾角，一年五百蚊都唔使就可以方便「啃毒果」，又鼓吹訂閲如何簡易快捷妥當，更好笑嘅係有作者吹完一輪毒果報如何有「深沈的意義」——「試想一下，某日一覺醒來，香港沒有《蘋果》了⋯⋯」筆者「嘰嘰」聲笑到即時有腹肌，如果真係咁，梗係學「日日做漢奸」都甘之如飴嘅李柱銘話齋：舒服晒！香港可以有明天喇！再沒有學生中毒，一味美化暴力以為自己係「火魔法師」，到處擲汽油彈，搞到香港變成恐怖城市！
仲有年紀大、腦筋開始壞嘅文人，鼓吹黎智英係「風骨錚錚頂天立地，四面八方的明槍暗箭之下始終無怨無悔」！阿姐，一個「為美國而戰」、被官媒斥為「禍港四人幫」之首，不折不扣係當代漢奸、民族敗類，理應被釘在歷史恥辱柱上，依家卻吹到佢成個聖人烈士咁款，仲有冇離譜啲吖？
嘞！係人都知，壹傳媒旗下報刊，為求銷紙，可以不顧道德倫理、社會責任揑造新聞，狗仔隊偷拍藝人明星換衫、誣造名人生癌、亂指人哋嘅洗髪水會致癌，害到人家雞毛鴨血。依家財困，一大堆黃到不問是非黑白嘅文人為其離罩鼓與吹，依然難挽回毒果報流失大量訂戶。
黎智英日前聯同十四位反對派人士被拘捕，佢就扮晒「正義鬥士」，披着羊皮高喊「就算多艱難，都要撐下去，因為這是我們的社會責任」。
筆者又要學反對派另一位大言炎炎嘅郭榮鏗口脗：如此反中亂港嘅第一漢奸，咁都咁膽高舉「社會責任」大旗，好心「慳啲喇」！其實，講到尾，就係叫市民支持訂閲毒果報。
壹傳媒四年半累蝕十八億元，其股價急挫九成，黎智英自己哀號訂閲人數暴跌二十萬，而幾乎冇廣告嘅毒果報可謂命懸一線，佢自己都私人墊支五點五億港元支撐。喂！你估你真係識印銀紙咩？筆者相信，一覺醒來冇毒果嘅「舒服晒」日子好快到來！而扮「社會責任」嘅叛國禍港者黎智英，慳啲喇！人窮則詐，市民眼睛係雪亮嘅，有乜理由訂毒果害自己仲害埋下一代？
原圖：星島日報
返回
