疫潮之下，人心惶惶，又是謠言漫天飛舞的時候！近日網上瘋傳一篇「AIRLINE NEWS」的「報道」截圖(見下圖)，說倫敦希斯路機場計劃關閉第三及第四座航空大樓，遲啲仲可能成個機場關閉添！(Heathrow Plans to Close Terminal’s 3 and 4 in Coming Days But Entire Airports Might Shut Within Weeks)

由於希斯路機場的第三及第四座航空大樓主要負責國際航線，有關傳言都影響到唔少依然滯留當地的香港人，大家都覺得有啲不知所措。但其實個「報道」真定假呢？

出處來自Blog

魔鬼就在細節裡！單睇截圖就彷彿真的一樣，但HKG報記者搵到有關網站，原來只是一個叫做「paddle your own kanoo」的Blog，裡面開了一個分類叫「AIRLINE NEWS」。

至於文章內容，作者聲稱希斯路機場關閉第三及第四座航空大樓是「綜合多方消息」，但除咗呢篇Blog文外，搵晒其他主要媒體都唔見有報呢則消息喎！

咁究竟件事係真係假？話真當然不是真，話假佢又假唔晒。例如文中引述的航空協會Airport Operators Association總幹事Karen Dee，便曾多次向不同媒體發出「警號」，指新冠肺炎疫情使航空生意斷崖式下跌，如果政府再不伸出援手，佢幾肯定英國啲機場會在幾周內關閉(UK airports ‘will shut down in weeks’ due to coronavirus)。

換言之，即係呢則「希斯路機場計劃關閉第三及第四座航空大樓」嘅「報道」得以瘋傳，亦反映咗疫症下航空業的真實困境，內容幾分真又幾分誇大老作，咁先至最容易呃到人，但作作吓亦有可能變咗「預言」成真呢。

都係嗰句，謠言止於智者，大家一齊為英國航空業默哀。

原圖︰網絡影片截圖