政府抗疫樣樣慢十拍，搞到香港呢個所謂「國際都會」，謠言滿天飛，政府失信於民，政策出爾反爾，肺炎變黐孖筋，跟住「武肺」就變「武腦」，接着就爆發「盲搶炎」。

喂！你想做個淡泊寧靜，可含笑而長逝嘅平凡人，依家難過羽化升仙啦！你睇吓超市啲大米、廁紙、衛生巾丶安全套都清架，一幅「未世難民圖」都冇咁悲壯！

之前年輕人就話「想扑嘢都冇地方」，凸顯政府覓地建公屋冇能，「房事革命」尚未成功，年輕人仍需努力！仲有吖！啲人撲完口罩仲要撲廁紙，大便都冇廁紙！一個「金融中心」嘅子民折墮成咁！林鄭果然能人所不能，化神奇為腐朽，真係點到你唔服！

西方恨不得中國死

新冠肺炎疫情持續擴散，日前確診病例已接近六萬，死亡人數亦逾一千三百人，已經超過二〇〇三年沙士期間全球七百七十四人死亡嘅總數，情況令人憂慮。英國醫專家就估計，內地疫情或將迎來高峰，武漢市可能有超過五十多萬人賴嘢！

西方國家恨不得中國死，一場新冠肺炎令國人再次嘗到屈辱滋味，丹麥媒體將五星旗改為病毒圖案；德國周刊形容新冠病毒係「中國製造」；美國佬就更加幸災樂禍，將「東亞病夫」嘅帽子重新扣到中國人身上！美國佬對中國近年崛起成為世界第二經濟體向來都唔順超，何況有預測好快就超越美國成為全球最大經濟體，依家仲唔趁你病攞你命咩！攞唔到你命，唱衰吓你，做吓阿Q都係過癮㗎！

英美等把疫情誇大

事實上，美國正值流感季節，死亡人數亦增至過萬人，美媒如《國會山報》指出，流感比新冠肺炎更危險！依家新冠肺炎疫情兇猛，傳言特別多！嘞嘞嘞！專家又話喇，要避免「三打」，即打邊爐、打麻雀及打茄輪。又呼籲唔好去戲院、卡拉Ok！唉！人生至此，仲有乜樂趣？自我孤獨隔離，畀你活到一百二十歲會過癮嗎？

國家衛健委就話未證實氣霧能播毒！而中大呼吸系統科講座教授許樹昌指，氣霧傳播在特定條件下才會發生，市民打邊爐、焗桑拿等活動，並不會增加氣霧傳播嘅風險。吾友傳來據云是某資深演員的文章，活於亂世，筆者姑且笑而看之，文章說，新冠肺炎十四億人裏面死了一千幾百個，大家就緊張了，口罩三天就斷貨了！愛滋病一年死七十七萬，也沒擋住勇闖者犯險的腳步；車禍每年死十五萬也還是那麼多人買車。

文章說明是為近年沉悶的生活解解壓，言下之意，遊戲文章，不要太認真。

中國的崛起是必然

事實上，聯合國的報告亦指出，全球因愛滋病死亡人數，從〇三至〇五年的每年一百七十萬人，到二〇一八年下降至七十七萬人，「世紀絕症」隨着醫學進步，已非不治之症！美國、英國等西方國家，一味對中國的疫情無限誇大，落井下石，美國率先撤僑，並火速將前往中國嘅旅遊警告提升至第四級「紅色」；當然，中國受疫情衝擊，經濟難免受到打擊，而老美則明顯是最大的受益者。美國商務部部長羅斯就講到出面：中國疫症暴發，有助工作崗位回流美國！

事實上，中華民族歷經多劫而依然屹立於東方！有西方學者便解釋這種現象：中國其實是一個文明，但他卻「偽裝」成了一個國家。西方傳統推崇決戰決勝，強調要壯舉，而中國嘅理念強調巧用計謀及迂回策略，耐心累積相對優勢！

在學者看來，中國的發展和崛起是必然的！

一場新冠肺炎就以為中國會「崩潰」，那是假洋鬼子、洋奴漢奸和無知者的「肺噏」！不值一哂！武漢加油！中國加油！

原圖：now新聞截圖