呢段感言係身邊其中一個同事親自打出嚟。
我好少會打咁大篇嘢，不過已經出動咗接近兩個月，港九新界全部暴亂地方我大部份都有去過，我真係有啲感受。
大家見到差館地下瞓喺度休息嘅警察，佢哋依班着普通制服嘅已經唔算係最攰嘅人，因為佢哋主要係防守差館內部，雖然都好辛苦，但差館入邊有嘢食，有廁所去。
我哋響街着綠色防暴衫掃蕩嗰啲同事仲辛苦，孭住三四十磅嘢，最長連續三十個鐘頭同班人對侍，攰到通街瞓馬路坑渠邊，攞啲爛水馬、紙皮箱墊住當枕頭我都親眼見過，條街好似「屍橫遍野」一樣。
一日三餐，送到來行動地點，就只可以輪流叫一小部份人暫時離開防線，坐響後面「十零二十米」內馬路上快食，因為有嘢發生要即刻走返返上嚟，琴日就係咁，有啲人啱啱輪到佢攞到個飯食咗一啖，前邊就有嘢發生，結果佢就返上去燒催淚煙向前推進，佢嗰餐飯，等咗成六七個鐘先輪到佢，就咁就冇咗.......
試過幾次根本送唔到啲飯嚟，因為啲路畀暴徒塞住晒，送返啲同事都畀人打，最終連續十個鐘不停消耗體力但冇嘢食。
依家大家學精咗，有得食都盡快食，但都唔敢食得多，因為食得多冇地方去廁所仲大鑊，另外女同事，去廁所有幾唔方便大家應該明白，除咗忍辱負重，忍屎忍尿都已經變成習慣，加上長期唔夠瞓，近排好多人病，但都唔敢攞病假，你自己病缺席，少咗人，即係令到你啲同事危險咗，不時見到同事自己攞包藥出嚟食，警察總部更加爆發手足口病，因為大家打緊仗，冇人會考慮儀態，通地瞓，通地食，衛生自然變差。
依家就好似打仗咁，你任何情況都唔可以行開，現時對面啲人隨時掟個汽油彈過嚟，磗頭好似落雨咁樣飛過嚟，我琴日都畀人用丫叉，畀類似石頭嘅嘢射中，好痛，但好彩冇爆缸流血，幾間差館畀人放火，通街都有人打大交，我哋好想去處理，但根本冇辦法離開已經被衝擊緊嘅防線。
香港亂咗咁耐，除咗警察仲有咩政府部門有大力幫過手？最心痛嘅仲係有唔少公務員，一齊幫街外人攻擊政府，出賣我哋，冇錯警察都有啲地方做得差，忍唔住過咗火，但係我哋都只係凡人，有血有肉有感情會受傷，我唔係機械人，都有啊媽生的…點解全世界要圍攻我哋？！
我唔介意大家廣傳出去，特別係畀仍然有良心，支持我哋嘅「沉默大多數」。
原圖：文匯報
http://paper.wenweipo.com/2019/08/06/HS1908060001.htm
投票已截止，多謝支持
返回
