民陣口口聲聲叫大家團結，但講到利益就立即同自己友割席？事緣6.12反修例遊行，多人被警方以暴動相關罪名拘捕，民主派陣營自然派人去幫手。豈料民陣義務律師團發聲明，指佢哋一直幫緊被捕人士，但點名批評自己友、律師伍展邦，話佢以個人或其律師行名義去提供法律支援，「嚴重妨礙律師團隊工作」、「危害被捕人士權益」，仲叫人要「小心選擇法律服務」云云。明明齊齊幫自己人，民陣義務律師團突然殺出要玩獨家，真係睇到人一頭霧水。但心水清的網友突破盲點，串爆指伍展邦其實係阻住民陣「發大財」，「你地（哋）當然想獨家啦，唔係點擺個錢箱cap水？」
除網友不齒民陣外，被點名攻擊的伍展邦亦有在FB反擊，狠批「大台」不顧局面帶頭分化，反問「大台」的行徑對整體有何好處？伍更自爆自己曾多次聯繫「大台」表示願意幫忙均不獲理會，而在帖文未段更暗指其忘恩負義﹐直言：「上年七一先幫『民陣』上訴警方的不反對通知書......」
君子喻於義，小人喻於利，因利失義的劇目，泛民還少嗎？難怪網民們一見到就往錢的方向諗，笑言「同行如敵國」、「原來佢阻住『民陣』發大財，你地（哋）當然想獨家啦，唔係點擺個錢箱cap水？」究竟邊個搶邊個生意、邊個阻邊個發財，只有民陣同有關人等才知道喇，但市民見到民陣才經歷了一場「大勝」，立即爆出內閧，除咗無奈同食花生，還可以做甚麼呢？
原圖：民陣Facebook
投票已截止，多謝支持
返回
