涉嫌舊年年初喺大埔用雷射筆襲警嘅18歲理工大學男學生吳志軒，今早喺粉嶺裁判法院被裁定襲警同管有攻擊武器罪成。裁判官陳炳宙指出，被告喺天橋上以綠色雷射筆打圈射向警車內警員，儘管距離太遠不足以致傷，但已足夠證明被告有意圖襲擊警員，同埋辯方亦都對被告管有涉案雷射筆冇異議，所以裁定被告兩項罪名成立。

陳官反駁辯方質疑受襲警員傷勢輕微未有求醫，稱「即使是槍林彈雨，盡責服務市民的警察也不應退縮，更何況本案的警察只面對一束雷射光線」。辯方呈上來自被告中學校長、老師、父母、親友嘅多封求情信，信中指被告有善良積極、品學兼優等等優點，希望法庭給予改過自新機會，繼續學業，回饋社會。辯方又稱被告乃初犯，並且冇預謀，案情亦非最嚴重，嘗試申請保釋等候判刑惟遭拒。陳官下令被告還柙至下月19日，以待索取勞教及更生中心報告。

原圖：頭條日報

https://hd.stheadline.com/news/realtime/hk/1987419