黃營區議員，果然是「極品」！話說佐敦寶發大廈疑有滲漏，街坊向佐敦南區議員陳梓維求助。但萬萬想不到，陳梓維竟以一個「神方法」試圖去解決問題——通知我對家（去處理），即轉介民建聯葉傲冬跟進。如此有諗頭，認真叫人佩服得五體投地。油尖旺區議會副主席、公民黨余德寶都睇唔過眼，在Facebook上留言︰「你唔識，可以搵我們同事幫手，而唔係去民建聯。請好好反思一下。」

陳只係叫人咪抽水

不過，又睇睇陳議員係點反思？一味在網上叫建制唔好抽水，話自己「放下立場搵你地(哋)！期望盡快解決問題」，之後又話「你地(哋)政治離棄街坊立場，連民生都離棄街坊健康立場！」嘩嘩嘩，屈委到一個點，原來區議員有問題搞唔掂，放下立場搵對家就叫完成職責，咁就可以出糧支薪，認真叫人大開眼界！

不過，余德寶咁同自己友「割席」，料有遭「查問」，佢今早又在網上發帖，話自己收到好多訊息，重申陳梓維要「好好反思」，因為街坊投票選了他，是希望他可以做得比上屆議員好。余德寶話相信唔少街坊都好失望，又話陳梓維覺得自己處理方法冇問題、冇檢討，先係問題真正所在。因而勸佢好好學習，共勉之咁話。

陳梓維一向語出驚人，出醜人前都唔係第一次(請按此重溫)。面對呢啲「同路人」，想割席而又冇得割，「核爆都唔割」，真係玩殘自己友囉！(笑)

原圖︰Andy Yu 余德寶Facebook

https://www.facebook.com/YuTakPoANDY/photos/3277499595600692