作為一國元首,如果要睇他國總統面色,都真係幾悲哀。美國總統特朗普日前於白宮發言後,去附近嘅聖約翰座堂「打卡」,手持聖經影相,而美國警方為咗幫侵侵總統開路,就以催淚彈、閃光彈及橡膠子彈等武力鎮壓附近示威者,惹嚟唔少批評;昨日有記者問到加拿大總理杜魯多點睇呢件事,搞到杜魯多當場Hang機,足足22秒「講不出聲」!
據媒體CGTN統計,杜魯多聽到問題後沉默22秒先開口,不過就冇直接回應記者問題,只係輕輕一句話對美國現時發生嘅事件感震驚,就將話題帶去加拿大都面對緊種族歧視嘅問題云云,提都冇提過侵侵總統所作所為喎。
杜魯多呢22秒被美媒BBC形容為「史詩式停頓」(epic pause),而英國《衛報》就串爆指杜魯多係「無話可說」(speechless),唔通杜魯多真係咁驚得罪侵侵?
原圖:無綫新聞截圖、CGTN片段截圖
投票已截止,多謝支持