抽警察水無恥！近來香港畀班黃絲暴徒搞到七國咁亂，警察更因被黃絲針對而壓力大增。喺呢個時候，吉野家疑以「撕紙狗」抽水，有網民因此嬲到爆，揚言唔再幫襯吉野家。

除咗示威衝突，黃絲近日大搞所謂嘅「連儂牆」，於大埔墟港鐵站附近行人隧道等地貼滿有辱警字眼嘅Memo紙，更有部分警員嘅資料及樣貌被貼上「連儂牆」，警方昨日凌晨到場清走含有警員資料嘅紙張，黃絲因而侮辱「清紙」嘅警員為「撕紙狗」，更將在香港被稱為「獅子狗」嘅竹輪Key上警員頭上，而吉野家竟然趁機抽水發辱警財，於其宣傳海報上擺上「獅子狗」，更寫住「唔准叫我獅子狗」，用嚟暗嘲撕「Memo紙」嘅警員。

Del貼文扮無事？

有網民得知事件後大感失望，即鬧爆吉野家，直指以後唔再光顧，有網民表示，「應該全力抵制，罷食吉野家」！而吉野家一開始係威係勢，有黃絲留言，「抽到咁！唯有去幫襯」，而吉野家就回覆話，「近排興隻『抽』嘛」！點知事件發酵後，吉野家即刻淆晒底，Del貼文想扮咩事都冇，只不過，「若要人不知，唔好太低Ｂ」。

吉野家將政治帶入商業，行為簡直令人憤怒。大家響應罷食吉野家嗎？

原圖：文匯報、無綫新聞截圖

http://paper.wenweipo.com/2019/07/11/HS1907110008.htm