篇野可能有啲長。

我係一個普通市民，係香港出世，土生土長，而父母則係因為走難落香港。

細細個嘅時候，聽阿媽同阿公成日講文革時期嘅黑暗，咩三反五反，咩紅衛兵搞批鬥，從佢哋口中得知，我有個大舅父畀紅衛兵批鬥而死咗，所以阿媽同阿公就憎到當時共產黨死，但係坦白講，我未見過大舅父，所以其實無咩特別感覺。

經歷過97金融風暴，2000年科網股爆破，03沙士嘅洗禮，覺得要生活安定最重要係有穩定嘅經濟能力，所以對我嚟講，只關心經濟，政治？我識條鐵咩，一直都唔上心，搞咩都好，唔好阻人搵食就得。

近年，睇新聞，都時時報道政治新聞，一班朋友聚會，以為會開開心心，亦好多時因為政治立場問題，而「討論」到面紅耳熱，我對呢啲情況覺得非常煩厭，我覺得，政治只有立場，無錯對之分，「甲之熊掌 乙之砒霜」，有咩好呦！？

直到佔中時期，一班舊同學去食飯，話題當然又係政治，一路都無咩出聲，直到有同學問我有贊成定反對，我話：「其實I don't care有無得選特首，有又好無又好，只係想佔中快啲完，唔好阻住日常社會運作，唔好阻人搵食講（包括我）。」

點知話口未完，個同學即刻指住我（真係隔住個位，用食指手指指咁喺我面前幾吋位）嚟鬧——「你呀！點可以咁自私呀！叫你犧牲少少都唔得？！你知唔知如果而家唔出聲，香港就無民主！無晒自由 ！遲啲連屎都無得食呀！你知唔知呀？！BLA BLA BLA……（下刪五百字）」

我當時反應係「吓？！」開頭嗰秒唔識反應，因為從來無諗過講無意見都會畀人鬧，當時無同佢拗，當條友飲大咗兩杯算數，事後有其他同學APPS我，話佢黃絲到出晒名，無人敢同佢呦，我鬼知咩，咁鬼耐無見，而且我只係無意見啫，都要鬧？？又話要言論自由？

上星期，同一個朋友去HAPPY HOUR，電視播緊新聞台，我無意地講咗句，「唉…又霸住條路，真係好煩，架的士咁就無咗一日車租，真係陰公。」個朋友話，嘩，你同我呻好啦，畀某啲人聽到，煩都煩死你，我話你又畀人鬧過？傾開原來佢有我類似經驗，又係無意見，不過佢好啲，佢只係成餐飯畀人係咁同佢講民主有幾好幾好，自由有幾好幾好，佢形容好似去咗層壓式推銷會，又或者邪教聚會咁……

我唔知有幾多人好似我咁嘅立場——無意見份子，討厭政治，但而家真係唔係好敢亂講政治立場，發現原來無意見都係罪，而壓力唔係來自政府，而係來自身邊朋友，回想當年阿媽成日講嘅文革時期紅衛兵搞批鬥真係有啲似，香港幾時變到好文革時期嘅大陸咁？香港仲係咪我以前認識嘅香港呢？？

---------------------我是分隔線---------------------

好日唔發文，佔唔到有咁多回帖，真係多謝晒！！

喺度講出長氣多兩句，我發文原因其實我只係分享我嘅經歷，（因為唔敢喺FACEBOOK發文，驚下次見到啲 FRIEND又畀人鬧）。

討厭政治原因係因為政治可以令一個人徹底改變，眼見好多人因為政治立場會連朋友都做唔成，其實咁又何必呢！？正如我嘅經歷，當日其實係有啲唔開心，咁大個人無幾可過畀人指住我個鼻鬧，黃子華話齋，搵食啫，犯法呀！？係呢度發文即使畀人話，起碼唔會畀人手指指，指住個鼻。而興幸係原來有好多人同我諗法相近，畀人話五毛？港豬？自私？是但啦！

當年亞洲四小龍：新加坡、南韓、台灣、香港，眼見台灣近廿年因為搞政治而令經濟停滯不前，而家已經落後於其他三地，只係唔想香港步台灣後塵，香港個老本——咩金融中心，其實唔食得好耐。

明白即使我唔理政治，生活都離不開政治，但覺得香港已經TOO MUCH政治，同意一個地方係需要反對派，但凡事都要適可而止，做得太盡唔一定係件好事。

原載：香港討論區

https://news.discuss.com.hk/viewthread.php?tid=28290890&extra=&page=1

原圖：有線新聞截圖